【Day 50】
一個決定就可以令成個結果唔同(廢話)。
話說今日打算由Varna去Veliko Tarnovo，係hostel有個人都係去同一個地方，佢搭十一點車，我就因為掛住同其他人吹水關係，未有時間執行李，所以走左去搭一點半個班，無同佢一齊走，咁就瀨野。
兩個地方車程大概三個鐘左右，但格車行左兩個鐘多小小時，突然停低。但左望右望點都唔似到左，因為只係見到一條高速公路同花花草草。
而車上既人開始嘰咧呱啦，係我完全聽唔明保加利亞文。等左陣終於忍唔住搵左個識講英文既當地人問咩料子。原來格車死火！
問題又到嘞！要等救援既話唔似香港，總有車廠或救援係左近，呢度要等由Varna既車黎接濟，即係要等兩個鐘左右。不過最後等左成三個鐘。
好彩個三個鐘識講英文既保加利亞人做左我既翻譯，解釋個情況俾我聽。點知大家又幾好吹，吹到拎埋大家既身份證出黎睇。佢對我張身份證好有興趣，因為唔明點解有張晶片係度。
之後又拎左D港幣俾佢睇，佢又好驚訝點解兩蚊銀係咁既形狀，因為當地銀仔都係得圓形，然後佢又唔明點解一個面值既紙幣會有唔同既公仔圖案，仲問係咪所有公仔都可以係香港用到。哈哈！當然見佢咁興趣就送左個兩蚊銀俾佢做紀念。
紀念壞車三小時。
諗諗下又唔算壞得哂，話哂都文化交流左幾個鐘。佢仲好好咁幫我搵埋地圖點去我間hostel。
最後九點幾先去到hostel，同個staff講我個情況加多句好肚餓，點知佢聽到就話廚房仲有小小傳統保加利亞晚餐係度，問我食唔食。當然食啦！
真係，都唔知搭點半個班車呢個決定係好事定壞事。
Blog：http://backpackersopoor.blogspot.hk/
Blog:http://blog.ulifestyle.com.hk/blogger/backpackersopoor/
Search